Pastisso de figà

Da Venicewiki, il wiki di Venezia

Alora, par far un bon pastisso de figà ghe vola un fià de tempo, ma ‘na volta fato se pol conservarlo in frigo e tirarlo fora co serve far i antipasti, guarnision, ecc. ma se pol anca magnarlo beo caldo co la polenta bea tendara e smissiando el tuto.

Se tiol figà misto de vedelo e de porçelo (mi co lo fasso ghe ne conto un chilo…), e tanto xe el figà, tanto ga da essar le çevole.

Se mete a scaldar in t’una fersora un goteselo de ojo co do spigoli de ajo, e col xe deventà maron se lo cava via e se ghe zonta le çevole che se gavarà parecià zà tajae a tocheti. Co le çecole le xe deventae trasparenti, se ghe zonta el figà taja anca elo a tocheti, se ghe zonta un bel goto de vin bianco e se coverse co un covercio a fogo lento, acciò che el se cusina ben sensa indurirse. A piasser se ghe zonta o un bel goto de marsala o uno de cognac o uno de mistrà o quelo che se vol de forte e che el piaza. Pevare e sal a piasser. Mejo se ‘na sc-ianta de pevare in più…

Col xe coto e che se gà ben reduto tuto in poltiglia – a zontarghe sempre vin se el se seca massa – bea morbida se passa tuto par un tamiso a busi larghi (adesso se costuma el frullator…) par un per de volte, fin che el diventa un bel impasto tendano e mantecà.

Se mete tuto un un per de scuelete o su dei stampati e se cassa tuto in frigo a soto zero acciò che el se solidifica.

Col serve, se lo tira fora un per de ore prima.

Se costuma metarlo a fetine o col scujer su dei tocheti de pan pena-pena brustolà e spalmà de butirro, o si nò come guarnission su un bel piato de selvadego rostìo.

Par sto piato ghe vol un bel vin rosso corposo e de bon grado, sul tipo de l’ Amarone de la Val Pantèna.